Մեներգեցողությունը Երևանի երաժշտական ստուդիա-կոնսերվատորիայի ուսումնական գործընթացում տեղ գրաված առաջին դասընթացներից է: Մեներգեցողության բաժինը ղեկավարել են՝ Արուս Բաբալյանը /1921-1924/, Աստղիկ /Աստրա/ Աբրահամյանը /1925-1927/, Ելենա Կագարյանը /1927-1935/, Նադեժդա Կարդյանը /1935-1939/: 1939 թվականին մեներգեցողության դասարանների հիման վրա կազմավորվեց ամբիոնը: Ամբիոնի վարիչներն են եղել՝ Նադեժդա Կարդյանը /1939-1943; 1949-1953/, Հայկանուշ Դանիելյանը /1943-1949/, Թամար Շահնազարյանը /1953-1964; 1965-1970; 1973-1977/, Արմենուհի Քարամյանը /1964-1965/, Պավել Լիսիցյանը /1970-1973/, Տաթևիկ Սազանդարյանը /1977-1988/, Գոհար Գասպարյանը /1988-2007/, Սուսաննա Մարտիրոսյանը /2007-2019/: 1998 թվականին մեներգեցողության ամբիոնի դասախոսների մի մասը միավորվեցին մեներգեցողության նոր ամբիոնում /հետագայում՝ մեներգեցողության N2 ամբիոն; ամբիոնի վարիչ՝ Սվետլանա Կոլոսարյան/: Մեներգեցողության ամբիոնները հիմնարար դերակատարում են ունեցել Հայաստանում համաշխարհային երգչական մշակույթի ավանդույթների արմատավորման  և հանրապետության երաժշտական թատրոններին, ֆիլհարմոնիկ կազմակերպություններին և ուսումնական հաստատություներին վոկալիստների բարձրակարգ կադրերով ապահովելու գործում։ Երևանի կոնսերվատորիայի մեներգեցողության ամբիոնները Հայաստանի մշակույթի առաջատար հաստատությունների հետ համատեղ հանդիսացան մի շարք հանրապետական մրցույթների հիմնադիր-նախաձեռնողները (այդ թվում՝ Ալեքսանդր Սպենդիարովի անվ., Ավետիք Իսահակյանի անվ., «Belcanto», Թամար Շահնազարյանի անվ., Տաթևիկ Սազանդարյանի անվ., Արշավիր Կարապետյանի անվ., Զարա Դոլուխանովայի և Պավել Լիսիցյանի անվ. և այլ, Գոհար Գասպարյանի անվ․): Երևանի կոնսերվատորիայի մեներգեցողության ամբիոնների ուսանողների, ասպիրանտների և շրջանավարտների թվում կան համաշխարհային օպերային և համերգային բեմահարթակներում ճանաչման արժանացած, միջազգային մրցույթների դափնեկիրներ. Հասմիկ Հացագործյան, Ջուլիետ Գալստյան, Գայանե Գրիգորյան, Արաքս Դավթյան, Աննա Մաիլյան, Լուսինե Մարկոսյան, Սուսաննա Մարտիրոսյան, Անահիտ Մխիթարյան, Բարսեղ Թումանյան, Հասմիկ Պապյան, Քրիստինե Սահակյան, Վարդուհի Խաչատրյան, Էլլադա Չախոյան, Գեղամ Գրիգորյան, Սարգիս Գույումջյան, Արսեն Սողոմոնյան, Լիպարիտ Ավետիսյան և այլք։