Երևանի կոնսերվատորիայի հիմնադրման օրվանից ուսումնական պրոցեսում ընդգրկված են եղել Երաժշտության տեսության ամբիոնի վարած երաժշտատեսական դասընթացները։ Այդ համակարգն առավել խորացված մշակվեց 1937 թվականից, երբ հիմնադրվեց պատմատեսական բաժինը: Երկար տարիներ գործելով երաժշտության պատմության, տեսության և կոմպոզիցիայի միացյալ ամբիոնի ներքո, երաժշտության տեսության ամբիոնը 1962-1972 թվականներին գործեց համատեղ կոմպոզիցիայի ամբիոնի հետ /ամբիոնի վարիչ՝ Ռոբերտ Աթայան/, իսկ հետագայում դարձավ առանձին կառույց: Ամբիոնի վարիչներն են եղել. Ռոբերտ Աթայանը /1972-1974 և 1982-1987/, Նովալիս Դերոյանը /1974-1976/, Ռաֆայել Ստեփանյանը /1976-1982/, Ռոբերտ Ամիրխանյանը /1987-2019/: Ամբիոնը պահպանում է կապը Մոսկվայի, Սանկտ-Պետերբուրգի և ԱՊՀ կոնսերվատորիաների հետ, նշանակալի դեր է ունեցել բարձրակարգ տեսաբան-երաժշտագետների պատրաստման, հանրապետությունում երաժշտատեսական մտքի խթանման և զարգացման գործում: Աշխատանքն իրականացվում է ազգային երաժշտական նյութի հիման վրա: