Շեփորահարների համար

Երևանի Կոմիտասի անվան պետական կոնսերվատորիայում Էրազմուս+ Erasmus+ծրագրի շրջանակներում հրավիրում ենք Ադրիայի Անտոնիո Բուցոլլայի անվան կոնսերվատորիայի պրոֆեսոր, Փողային գործիքների բաժնի ղեկավար, շեփորահար Պիեր Ջորջիո Ռիչիի / Pier Giorgio Ricci / վարպետության դասերին։

Ադրիայի Անտոնիո Բուզոլլայի անվան կոնսերվատորիա /Իտալիա/

Հոկտեմբերի 13, 15

Ժամը 11։00

Ակուստիկ լաբորատորիա

Պիեր Ջորջիո Ռիչին 1984 թվականին ավարտել է շեփորի մասնագիտական ուսումը։ 1985 թվականին Մոնոպոլիում (Իտալիա) մասնակցել է Դեյվիդ Շորթի վարած՝ պղնձափողային գործիքների կամերային երաժշտության և բարոկո շեփորի դասընթացներին՝ արժանանալով ուսումնական մրցանակի։ Հաջողությամբ մասնակցել է Իտալիայի առաջատար օպերային թատրոնների և սիմֆոնիկ նվագախմբերի լսումներին ու մրցույթներին՝ շարունակաբար համագործակցելով Ֆլորենցիայի քաղաքային թատրոնի, Հռոմի օպերային թատրոնի, Միլանի «Լա Սկալա» թատրոնի, Վերոնայի «Արենայի», Տրիեստի քաղաքային թատրոնի, Վենետիկի «Լա Ֆենիչե» և Տրևիզոյի քաղաքային թատրոնների հետ։ Ֆլորենցիայի քաղաքային թատրոնի 1987 թվականի լսումներում զբաղեցրել է երկրորդ տեղը, Վերոնայի «Արենայի» 1990 թվականի լսումներում՝ առաջին տեղը, իսկ 1993 թվականին հաջողությամբ անցել է առաջին շեփորահարի պաշտոնի մրցույթը։ Տրիեստի քաղաքային թատրոնի 1990 թվականի և Վենետիկի «Լա Ֆենիչե» թատրոնի 1992 թվականի լսումներում զբաղեցրել է երրորդ տեղը։ Համագործակցել է նաև Տոսկանայի տարածաշրջանային նվագախմբի, Թուրինի RAI սիմֆոնիկ նվագախմբի, Միլանի «I Pomeriggi Musicali» նվագախմբի, Թուրինի և Ուդինեի ֆիլհարմոնիկ նվագախմբերի, ինչպես նաև Պարմայի Արտուրո Տոսկանինիի անվան նվագախմբի հետ։ Որպես առաջին շեփորահար հանդես է եկել Տրևիզոյի և Տրիեստի քաղաքային թատրոնների նվագախմբերում, Միլանի «I Pomeriggi Musicali», Ուդինեի և Թուրինի ֆիլհարմոնիկ նվագախմբերում։

1991 թվականին մասնակցել է Բրեմենի շեփորի միջազգային օրերին՝ հնարավորություն ստանալով ուսանելու միջազգային ճանաչում ունեցող երաժիշտների՝ Կոնրադին Գրոթի, Բո Նիլսոնի, Ալլան Վիցուտիի, Պիեռ Տիբոյի, Էդվարդ Հ. Թարի, Արտուրո Սանդովալի և Էնթոնի Փլոգի մոտ։ Զուգահեռաբար զբաղվել է կամերային երաժշտությամբ՝ հանդես գալով տարբեր կազմերում։ 1992 թվականին Բոլցանոյի միջազգային երաժշտական հանդիպումների շրջանակում կատարել է Լուչանո Բերիոյի «Sequenza X» ստեղծագործությունը։ Եղել է ժամանակակից երաժշտության «Բրունո Մադեռնա» անսամբլի անդամ։ Անսամբլի հետ «Edipan» հրատարակչության համար ձայնագրել է Գաետանո Ջանի Լուպորինիի երաժշտությանը նվիրված հեղինակային ձայնասկավառակ։

Գործիքային մասնագիտական ուսմանը զուգահեռ կոմպոզիցիա է ուսումնասիրել Ֆլորենցիայի Լուիջի Քերուբինիի անվան կոնսերվատորիայում՝ Ռոզարիո Միրիլյանոյի և Դամիանո Դ’Ամբրոզիոյի ղեկավարությամբ։ 1997 թվականի հունիսին Կլոդ Ռիպասի ղեկավարությամբ Ցյուրիխի կոնսերվատորիայում և երաժշտական բարձրագույն դպրոցում ստացել է մենակատարի դիպլոմ՝ «Konzertreifediplom»։ 2007 թվականին Լուկկայի Լուիջի Բոկկերինիի անվան երաժշտական ինստիտուտում ստացել է երաժշտական մասնագիտությունների երկրորդ աստիճանի ակադեմիական դիպլոմ՝ պաշտպանելով Դյորդ Լիգետիի Երկրորդ լարային կվարտետին նվիրված ավարտական աշխատանքը։

Շեփոր և տրոմբոն է դասավանդել Կալյարիի Ջովաննի Պիեռլուիջի դա Պալեստրինայի, Մանտովայի Լուչո Կամպիանիի, Տրիեստի Ջուզեպպե Տարտինիի, Կաստելֆրանկո Վենետոյի Ագոստինո Ստեֆանիի, Պադովայի Չեզարե Պոլլինիի, Բոլոնիայի Ջովաննի Բատիստա Մարտինիի և Չեզենայի Բրունո Մադեռնայի անվան կոնսերվատորիաներում։