Մասնագիտական դաշնամուրի և երգեհոնի ամբիոնի պրոֆեսոր Վաղարշակ Հարությունյանի դասարանի 2-րդ կուրսի ուսանող Էդուարդ Արևշատյանը արժանացել է 2026 թվականի «Pacific Stars» դաշնամուրի միջազգային մրցույթի երկրորդ մրցանակին՝ «Պրոֆեսիոնալ կատարող» անվանակարգում։

Էդուարդ Արևշատյանը ներկայացրել էր հետևյալ ծրագիրը՝

1. Սերգեյ Պրոկոֆև - Դաշնամուրի սոնատ № 6, A-dur, երկ 82

2. Ալեքսանդր Սկրյաբին - Էտյուդ, երկ 8, № 10

3. Ֆրեդերիկ Շոպեն - Օրորոցային, Des dur, երկ 57

«Ծավալուն և բովանդակային առումով չափազանց հարուստ ծրագիր՝ կատարված տեխնիկական ու գեղարվեստական ամենաբարձր մակարդակով։ Բրավո՛։

Ս․ Պրոկոֆևի Վեցերորդ սոնատի Ձեր կատարումը վստահ էր, հղկված, դրամատիկ և խիստ տպավորիչ։ Դուք տիրապետում եք փայլուն տեխնիկայի՝ մեծ հստակությամբ, և կարողացել եք շատ պարզ տարանջատել բազմաձայն հյուսվածքի շերտերը։ Երաժշտական ընթացքի կազմակերպումը գերազանց է․ Դուք հմտորեն կառուցել եք զարգացումը՝ հասնելով հզոր, մոնումենտալ գագաթնակետերի։ Ձեր դինամիկ երանգների լայն ընդգրկումը, հատկապես՝ շատ մեղմ նվագը, հրաշալի է և իսկապես բնորոշում է Ձեր կատարողական արվեստը։

Երկրորդ մասում կատարելապես արտահայտել եք քմահաճ տրամադրությունն ու բնույթը՝ հումորի վառ զգացողությամբ։ Բոլոր դժվար թռիչքները կատարել եք անթերի։

Երրորդ մասը քնարական էր, կարոտով ու ձգտումով համակված, և գեղեցիկ, սահուն ընթացք ուներ։ Ձեր pianissimo հատվածները կախարդական էին։

Չորրորդ մասի թեթևությունն ու հստակությունը հիանալի էին և հրաշալի ավարտ հաղորդեցին Ձեր՝ ունկնդրին ամբողջությամբ կլանող կատարմանը։

Ա․ Սկրյաբինի էտյուդը փայլուն էր և միաժամանակ՝ քնարական։

Ֆ․ Շոպենի «Օրորոցայինը» գեղեցիկ հակադրություն ստեղծեց և ցույց տվեց, որ Դուք կարողանում եք նաև ձևավորել գեղեցիկ, քնարական ու սահուն մեղեդիական գծեր։ Որոշ հատվածներում կարելի էր նվագել առավել զուսպ, սակայն Ձեր կատարումը հիասքանչ էր։

Պրոկոֆևի կատարումը ուշադրություն էր գրավում։ Բրավո՛»։

Մեկնաբանումը՝ ժյուրիի անդամ Լիդիա Արտիմիվի (միջազգային հարուստ գործունեություն ծավալած ամերիկացի դաշնակահար և մանկավարժ, հանդես է եկել մենահամերգներով, նվագախմբերի հետ և կամերային անսամբլներում, ինչպես նաև կատարելով ձայնագրություններ։ 1989–2020 թվականներին դասավանդել է Մինեսոտայի համալսարանում)

Մրցույթին մասնակցել է շուրջ 800 կատարող աշխարհի տարբեր երկրներից, որոնց միայն 10 տոկոսն է արժանացել մրցանակների։ Միջազգային ժյուրին բարձր է գնահատել Էդուարդ Արևշատյանի կատարումը՝ առանձնացնելով նրա գեղարվեստական վարպետությունն ու տեխնիկական գերազանց պատրաստվածությունը։ Մրցանակի շրջանակում դաշնակահարը նաև առանց լրացուցիչ ընտրական փուլի ընդունվելու հնարավորություն է ստացել՝ որպես արտիստ մասնակցելու 2027 թվականի «Music Fest Perugia» երաժշտական փառատոնին։ Մրցանակակիրների համերգը նախատեսված է 2026 թվականի դեկտեմբերի 12-ին, Լոս Անջելեսում (ԱՄՆ)՝ Mt. San Antonio College (Mt. SAC) քոլեջի համերգային դահլիճում։

Մրցույթի պաշտոնական արդյունքներին կարող եք ծանոթանալ «Pacific Stars»-ի կայքում https://www.pacificstars.org/ և Alink-Argerich Foundation հարթակում։

Շնորհավորում ենք Էդուարդ Արևշատյանին այս նշանակալի նվաճման առթիվ և մաղթում նոր հաջողություններ ու բեմական ձեռքբերումներ։

Էդուարդ Արևշատյանի հաղթանակի մասին անդրադարձը MediaLab-ում տես մեկնաբանությունում։