Նվագախմբային

Փողային գործիքների բաժինը բացվել է 1925թ.: Առաջին մանկավարժը օժտված երաժիշտ Վիլհելմ Շպերլինգն էր: Մեկ տարի անց Թիֆլիսից հրավիրվում են Ստեպան Դովգանը (կլարնետ), Արամ Մանգասարյանը (տրոմբոն), ապա՝ Ստեպան Շադուրոն (գալարափող): 1930-ին կոնսերվատորիան տալիս է առաջին շրջանավարտներին, նրանց շարքում էր նաև փողային բաժնի ուսանող Գուգուշ Թարայանը, ով կդառնա շեփորի դասարանի հիմնադիրը, իսկ մեկ այլ՝ ֆլեյտայի դասարանի ծնունդը կապված է Հայկ Ղասաբյանի անվան հետ: Փողային և հարվածային գործիքների դասարանները 1954 թվականին միաձուլվեցին փողային և հարվածային գործիքների ամբիոնի կազմի մեջ: Հետագա  սերունդների ուսումնական, համերգային ու մրցութային կենսագրության մեջ միշտ զուգահեռվել են հայրենական ու արտասահմանյան դպրոցների ավանդույթները, որոնց կրողներն են եղել Մկրտիչ Թուլակյանը, Միքայել Խաչատրյանը, Յուրի Բալյանը, Լևոն Բրուտյանը, Աբգար Մուրադյանը, Սիգիզմունդ Ներսիսյանը, Ալեքսանդր Մանուկյանը, Գարի Մայիլյանը, Օմար Պապիկյանը, Գուրգեն Գևորգյանը, Տիգրան Գևորգյանը և ուրիշները։ Ամբիոնի ղեկավարները եղել են. Հայկ Ղասաբյանը /1954-1979/, Միքայել Խաչատրյանը /1979-1990/, Յուրի Բալյանը /1990-2003/, Աբգար Մուրադյանը /2003-2011/, Նորի Գալստյանը /2011-2019/: Ամբիոնի լայն գործունեության շրջանակներում իրականացվում է դասավանդման մեթոդաբանության մշակումը՝ հիմնված ռուսական և եվրոպական դպրոցների լավագույն ավանդույթների վրա, դասախոսների և ուսանողների բազմաբնույթ կատարողական գործունեությունը, սերտ կապը հայ կոմպոզիտորների հետ, օժանդակությունը հանրապետության երաժշտական հաստատություններին ու բազմաթիվ փողային նվագախմբերին: Երևանի կոնսերվատորիայի փողային և հարվածային նվագարանների ամբիոնի կարևորագույն ձեռքբերումը Հայաստանում փողային կատարողականության համաշխարհային մշակույթի արմատավորումն է և հանրապետությանը բարձրակարգ մասնագետներով ապահովելը, որոնցից շատերը տարբեր մակարդակի մրցույթների դափնեկիրներ են:

Երևանի կոնսերվատորիայի գործունեության առաջին իսկ օրերից ակտիվորեն գործող կամերային անսամբլի և կվարտետի դասարանների ստեղծագործական հասունացումն ու քանակական աճը խթան հանդիսացան 1955 թվականին նրանց հիմքի վրա, լարային գործիքների ամբիոնին կից ինքնուրույն բաժին ստեղծելու համար /առաջին տարում այն ղեկավարեց Հրաչյա Աբաջյանը, այնուհետև՝ Կարեն Կոստանյանը/: 1961 թվականին բաժինը վերակազմավորվեց ամբիոնի: Ամբիոնի վարիչներն են եղել Կարեն Կոստանյանը /1961-1983/, Լևոն Մամիկոնյանը /1983-1991/, Ալլա Բերբերյանը /1991-2017/, Ջուլիետա Խաչատրյանը /2017-2019/: Կամերային անսամբլի բազմապրոֆիլային միջֆակուլտետային ամբիոնը Երևանի կոնսերվատորիայի ենթաբաժինների շարքում կենտրոնական տեղերից մեկն է զբաղեցնում:

Ամբիոնի գործունեությունը ծավալվում է հենց իր կողմից խթանվող հայ կամերային-կատարողական արվեստի աճի ներքո՝ սերտորեն կապված կամերային անսամբլային ժանրերում հայ կոմպոզիտորական դպրոցի խոշոր նվաճումների հետ: Ուսանողների հետ գործնական աշխատանքը համատեղվում է դասավանդման մեթոդաբանության խորացված մշակման հետ, ինչպես և հանրապետության դպրոցներում կամերային անսամբլի դասարան կազմակերպելու գործին աջակցելով: Ամբիոնի դասախոսները, որպես տարբեր անսամբլների մենակատարներ, ակտիվորեն մասնակցում են հանրապետության համերգային կյանքին: Ամբիոնի շրջանավարտների թվում շատ են միջազգային և տարածաշրջանային մրցույթների դափնեկիրները:

Երևանի կոնսերվատորիայի կամերային անսամբլի ամբիոնի բուռն աճն ու ճյուղավորումը հիմքեր ստեղծեցին 1995 թվականին նրա կազմից դուրս բերելու համար լարային կվարտետները և վերջիններիս հիման վրա ստեղծելու լարային կվարտետի ինքնուրույն ամբիոնը /ամբիոնի վարիչներն են եղել Ռուբեն Ալթունյանը՝ 1995-2005, Վիկտոր Խաչատրյանը՝ /2005-2012/, Էդիտա Ավագյանը /2013-2019/: Ամբիոնի ստեղծումը հիշարժան շրջափուլ դարձավ հայ կվարտետային մշակույթի հարուստ ու հետաքրքիր պատմության զարգացման ընթացքում: Այդ մշակույթի դրոշակակիրը եղել և մնում է Կոմիտասի անվան կվարտետը, որը ղեկավարել են Ավետ Գաբրիելյանը, այնուհետև Էդուարդ Թադևոսյանը: 

Ամբիոնի սաները համալրում են ամենաճանաչված լարային կվարտետների կազմերը։ Ամբիոնի դասախոսները և շրջանավարտները մեծ ներդրում ունեն հայկական կվարտետային երաժշտության տարածման գործում։