Դաշնամուրային

Կոնցերտմայստերական պատրաստման դասընթացը ներմուծվեց Երևանի կոնսերվատորիայի ուսումնական գործընթացում 1929 թվականին: Դաշնամուրային բաժնում այն վարում էին Գևորգ Բուդաղյանը, հետո Ալեքսանդր Դոլուխանյանը, Գրիգորի Դոմբաևը, օպերային թատրոնի առաջատար կոնցերտմայստերներ Սոֆյա Մելիք-Բեգլարովան, Գալինա Ալեքսանդրովան, Նինա Սաղյանը և ուրիշներ: 1961 թվականին դասընթացը  տեղափոխվեց կամերային անսամբլի վարույթի տակ /ամբիոնի վարիչ՝ Կարեն Կոստանյան/: 1970 թվականին կազմավորվեց կոնցերտմայստերական պատրաստման ամբիոնը: Աբիոնի վարիչներն են եղել. Հեղինե Տեր-Ղևոնդյանը /1970-1990/, Ալդա Զաքարյանը /1990-1995/, Հովհաննես Փարաջանյանը /1995-1996/, Ադա Հակոբյանը /1996-2005/, Սենորա Գյուլբուդաղյանը /2006-2022/: Ամբիոնը միավորել է հանրապետության առաջատար կոնցերտմայստերներին, որոնք ելույթներով հանդես են եկել և գալիս լավագույն մենակատարների հետ Հայաստանում և նրա սահմաններից դուրս հարյուրավոր քաղաքներում: Ամբիոնը մեծ դերակատարում ունի այս կարևորագույն դասընթացի մասնագիտացման, առանց բացառության, Հայաստանի բոլոր երաժշտական հաստատությունների համար բարձրակարգ մասնագետ-կոնցերտմայստերների պատրաստման գործում: Ամբիոնի շրջանավարտ դասախոսներից, ասպիրանտներից և ուսանողներից շատերը միջազգային և տարաշածրջանային մրցույթներում արժանացել են «Լավագույն կոնցերտմայստերական աշխատանքի համար» մրցանակների։ 

Ընդհանուր դաշնամուրի դասընթացը ներմուծվել է դեռևս Երևանի երաժշտական ստուդիայի ուսումնական գործընթացում, իսկ այնուհետև՝ կոնսերվատորիայում, գործունեության առաջին իսկ տարիներից /անհրաժեշտության դեպքում դասավանդելու էին հրավիրվում մասնագիտական դաշնամուրի դասախոսները և լավագույն դաշնակահար-ուսանողները/: 1940 թվականին ընդհանուր դաշնամուրի ամբիոնի կազմավորումը հնարավորություն տվեց կատարելագործելու այդ միջֆակուլտետային դասընթացի դասավանդման մեթոդիկան:

Ամբիոնը ղեկավարել են. Օլգա Բաբասյանը /1940-1969/, Արփիկ Ազիզյանը /1969-1979/, Էդուարդ Աբրահամյանը /1979-1986/, Զեմֆիրա Բարսեղյանը /1987-1994/, Էլեոնորա Գասպարյանը /1994-2011/, Սվետլանա Դավթյանը /2011-ից/: Ամբիոնում ձևավորված հարուստ ավանդույթները փոխանցվում են նոր դասախոսական սերնդին:

Ամբիոնի դասախոսների հեղինակությամբ ստեղծվել են մեթոդական մշակումներ և մատենագրական ուղեցույցներ, գիտահանրամատչելի գրքույկներ, մենագրություններ և բազմաթիվ փոխադրումներ 2 և 4 ձեռքերի համար: Լայն տարածում են ստացել ուսանողների և դասախոսների համատեղ թեմատիկ համերգները ֆիլհարմոնիկ բեմահարթակներում:

Ամբիոնը մեծ դերակատարություն ունի ոչ միայն ուսանողներին հաղորդակից դարձնելով դաշնամուրային կատարողականությանը, այլև հարստացնելով նրանց աշխարհայացքն ու ձևավորելով երաժշտի անհատականությունը: Առավել առաջադեմ ուսանողների հաջողությունները շատ դեպքերում հնարավորություն են տվել նրանց՝ փոխադրվելու մասնագիտական դաշնամուրի ամբիոն   

Մեթոդաբանության ու կատարողական արվեստ դասընթացները կոնսերվատորիայում ներմուծվել են 1950-ականներից։ 1980 թվականին վաստակաշատ մանկավարժ ու գիտնական Շուշանիկ Ափոյանի ջանքերով ստեղծվեց նոր ամբիոն, որը 1990 – 2019 թվականները ղեկավարել է արվեստագիտության դոկտոր, պրոֆեսոր Իրինա Զոլատովան։ 

Ամբիոնի գործունեության առաջնային ուղղություններն են՝ մասնագիտացված դասընթացների մշակումն ու ներմուծումը, պրոֆիլային թեմաներով մեթոդական ձեռնարկների, մենագրությունների, գիտական հոդվածների, նոտային և մասնագիտական ժողովածուների ստեղծումը, ասպիրանտների ատենախոսական ուսումնասիրությունների իրականացումն ու ղեկավարումը, մասնակցությունը գիտաժողովներին /այդ թվում՝ միջազգային/, հրապարակախոսական ելույթները մամուլում, մեթոդական օժանդակությունը հանրապետության երաժշտական հաստատություններին և այլն:

Ամբիոնն ընդգրկում է  գիտամանկավարժական, մեթոդական և երաժշտական դաստիարակությանը վերաբերող բազմազան ոլորտները, 2019-ից գործում է միջառարկայական մասնագիտացման կենտրոնը, կյանքի է կոչվում ուսումնական պրակտիկայի նոր ձևաչափ, որի շնորհիվ համագործակցության նոր հնարավորություններ են ստեղծվում երաժշտական կրթօջախների հետ: