Վոկալ-տեսական

Ռոմանոս Մելիքյանը կարևորում էր տեսական ու պատմական գիտելիքները պրոֆեսիոնալ երաժշտի ուսուցման ընթացքում: 1938 թվականին Կոնստանտին Մելիք-Վրթանեսյանի, Զավեն Վարդանյանի և ռեկտոր Սամսոն Գասպարյանի նախաձեռնությամբ ստեղծված երաժշտագիտական բաժինն ընդունում է առաջին ուսանողներին: Հայ երաժշտագիտության ու կոնսերվատորիայի պատմության մեջ առանձնահատուկ տեղ ունեն մեծանուն գիտնականներ Գեորգի Տիգրանովը, Ալեքսանդր Շահվերդյանը, Քրիստոփոր Քուշնարյանը, որոնց նախանշած բարձր նշաձողը շարունակեցին կրտսեր ժամանակակիցներն ու հետագա սերնդի ներկայացուցիչները՝ Աննա Բարսամյանը, Մարգարիտ Հարությունյանը, Արմեն Բուդաղյանը, Արաքսի Սարյանը, Իրինա Տիգրանովան, Ժաննա Զուրաբյանը, Զառա Տեր-Ղազարյանը, Մհեր Նավոյանը և ուրիշները։

1962 թվականից aմբիոնը միավորեց երաժշտա-պատմական դասընթացները, որոնք ներմուծվել էին Երևանի կոնսերվատորիայի ուսումնական գործընթացում նրա սկզբնավորման օրվանից և համակարգվեցին 1937 թվականին պատմատեսական բաժնի հիմնադրումով: Բաժնի /այնուհետև ամբիոնի/ ղեկավարներն են եղել. Կոնստանտին Մելիք-Վրթանեսյանը /1937-1943 և 1958-1960/, Գեորգի Տիգրանովը /1943-1947/, Տիգրան Տեր-Մարտիրոսյանը /1947-1948/, Անուշավան Տեր-Ղևոնդյանը /1948-1958/, Գևորգ Բուդաղյանը /196-1962/, Մարգարիտ Հարությունյանը /1962-1974 և 1982-1995/, Աննա Բարսամյանը /1974-1976/, Արմեն Բուդաղյանը /1976-1982/, Արաքսի Սարյանը /1995-2013/, Լուսինե Սահակյանը /2014-2026/։ Ամբիոնը աջակցում է հանրապետության երաժշտական ուսումնարաններին և դպրոցներին, ինչպես նաև սփյուռքի երաժշտական հաստատություններին: Ամբիոնի աշխատանքն ընթանում է փոխադարձ համագործակցությամբ գիտական, կրթական, մշակութային տարբեր կազմակերպությունների հետ։ 

Ամբիոնը պատմական դեր ունի դեռևս Կոմիտասից սկիզբ առնող հայ երաժշտագիտության ավանդույթներն ամրապնդելու և զարգացնելու, հանրապետությունը բարձրակարգ մասնագետներով ապահովելու գործում, որոնք իրենց արժանի տեղն են զբաղեցնում պատմաբան-երաժշտագետի աշխատանքի հետ կապված մշակույթի բոլոր բնագավառներում. հետազոտողներ, մանկավարժներ, երաժշտական-կյանքի կազմակերպիչներ, դասախոս-պրոպագանդիստներ, թանգարանների և արխիվների աշխատողներ, ԶԼՄ-ների և գիտական հրատարակչությունների աշխատակիցներ և այլն։

Երաժշտության տեսության ամբիոնը վարում է Երևանի կոնսերվատորիայում  հիմնադրման օրից ներառած երաժշտատեսական դասընթացները։ Երկար տարիներ գործելով երաժշտության պատմության, տեսության և կոմպոզիցիայի միացյալ ամբիոնի ներքո, երաժշտության տեսության ամբիոնը 1962-1972 թվականներին գործեց համատեղ կոմպոզիցիայի ամբիոնի հետ /ամբիոնի վարիչ՝ Ռոբերտ Աթայան/, իսկ հետագայում դարձավ առանձին կառույց: Ամբիոնի վարիչներն են եղել. Ռոբերտ Աթայանը /1972-1974 և 1982-1987/, Նովալիս Դերոյանը /1974-1976/, Ռաֆայել Ստեփանյանը /1976-1982/, Ռոբերտ Ամիրխանյանը /1987-2018/։ Անուրանալի է 20-րդ դարի անվանի տեսաբաններ՝ Ռոբերտ Աթայանի, Գայանե Չեբոտարյանի, Սուսաննա Ամատունու, Էդվարդ Փաշինյանի, Նովալիս Դերոյանի, Ռաֆայել Ստեփանյանի, Արմեն Անանյանի մանկավարաժական ու գիտական գործունեությունը։ Ամբիոնի միջազգային կապերն իրականացվում են արտասահմանյան երաժշտական հրատարակչությունների /հոդվածների ժողովածուներ, հանրագիտարաններ և այլն/ միջոցով, Հայաստանում և նրա սահմաններից դուրս անցկացվող միջազգային գիտաժողովներին և համաժողովներին մասնակցությամբ: Ամբիոնը ակտիվ կապ է պահպանում Մոսկվայի, Սանկտ-Պետերբուրգի և ԱՊՀ կոնսերվատորիաների հետ։ Ամբիոնը նշանակալի դեր է ունեցել բարձրակարգ տեսաբան-երաժշտագետների պատրաստման, հանրապետությունում երաժշտատեսական մտքի խթանման և զարգացման գործում: Աշխատանքն իրականացվում է ազգային երաժշտական նյութի հիման վրա: Մշակվել են հայալեզու երաժշտատեսական գիտական տերմինաբանության հիմքերը: 

Կոմիտասն իր երազած կոնսերվատորիայում պետք է կրթեր հայ երաժիշտների, ովքեր կնվիրվեին ազգային երաժշտության ուսումնասիրմանը: Երաժշտական ստուդիայի, ապա՝ կոնսերվատորիայի առաջին ղեկավար՝ Ռոմանոս Մելիքյանը հիմնադրում է ժողովրդական երգերի հավաքման ավանդույթը՝ նախանշելով ապագա ֆոլկլորագիտության ամբիոնի առանցքային ասպարեզը: 1969 թվականին Կոմիտասի 100-ամյակի առիթով բացվեց ժողովրդական ստեղծագործության կաբինետը, որը գլխավորել են Մարգարիտ Բրուտյանը /1969-1979/, Հասմիկ Էլոյանը /1979-1980/, Անահիտ Կիրակոսյանը /1980-2004/, Աստղիկ Սահակյանը /2004 թվականից/: Կես դարից ավելի այստեղ ապրում են կաբինետի հիմնադրի՝ Մարգարիտ Բրուտյանի ստեղծած գիտամանկավարժական ավանդույթները՝ երաժշտական նյութի հավաքագրում, համակարգում, վերծանում, մշակում, խմբագրում, հրատարակում: 1988 թվականից կաբինետի ուսումնական կարգավիճակը վերափոխվում է ամբիոնի, որի ամենաբեղուն տարիները կապվում են վաստակաշատ պրոֆեսոր Ալինա Փահլևանյանի ղեկավարության հետ։ Իրենց բազմաբնույթ գործունեությունն են ծավալում ժամանակի անվանի գիտնականները և երաժիշտները, այդ թվում՝ Աննա Արևշատյանը, Մհեր Նավոյանը, Լիլիթ Երնջակյանը, Անահիտ Բաղդասարյանը, Թովմաս Պողոսյանը և ուրիշները։

Ամբիոնի բնորոշ հատկանիշը բազմապրոֆիլայնությունն է՝ համադրելով գործնական և գիտական-հրատարակչական գործի հետ: Աշխատանքն ընթանում է ՀՀ ԳԱԱ Արվեստի ինստիտուտի և մերձավոր ու հեռավոր արտերկրների ֆոլկլորագիտական կենտրոնների հետ համագործակցությամբ։ Ներկայումս կաբինետի և ամբիոնի ձայնադարանում առկա 14000 ֆոլկլորային նմուշները հավաքվել են Հայաստանում /ավելի քան 20 մարզերում և քաղաքներում/, Վրաստանի, Հյուսիսային Կովկասի, Սև ծովի ափի, ինչպես նաև Լեհաստանի, Ռումինիայի հայաբնակ շրջաններում: Հավաքված նյութը վերծանվում է դասախոսների ուժերով՝ ներգրավելով նաև ուսանողներին։ Առաջին անգամ Երևանի կոնսերվատորիայի ուսումնական գործընթացում ներմուծված դասընթացներն են՝ Հայ ժողովրդական երաժշտական ստեղծագործություն, Հայ ժողովրդական բանաստեղծական արվեստ, Հայ միջնադարյան մոնոդիկ երաժշտություն, Հայ հոգևոր երաժշտություն, Հայ աշուղական երաժշտություն, Արևելքի դասական երաժշտության հիմունքներ, Ժողովրդական երգերի վերծանում, վերլուծում և մատենագրում, Ժողովրդական երգերի և գործիքային մեղեդիների վերծանում, Հայկական նոտագրություն, մասնագիտացումներ՝ ֆոլկլորագիտություն, միջնադարագիտություն, աշուղագիտություն։

Կոնսերվատորիայի հիմնադրման պահից պրոֆեսիոնալ երաժշտական կրթության կարևոր օղակներից էր Ռոմանոս Մելիքյանի ստեղծած ու ղեկավարած ուսանողական երգչախումբը, որը մեր երաժշտական կյանքում Հայաստանից դուրս առաջին հաջողություններն ունեցող կոլեկտիվն էր: Խմբավարության ամբիոնը ստեղծվել է 1946-ին՝ ռեկտոր Կոնստանտին Սարաջևի նախաձեռնությամբ: Առաջին ղեկավարը Թաթուլ Ալթունյանն էր: Նրա ղեկավարությամբ ամբիոնում դրվել են կոնսերվատորիական երգչախմբի հետ խմբավար ուսանողների գործնական աշխատանքի հիմքերը:  Կոնսերվատորիայի ոչ մի ամբիոն ափյուռքահայ երաժիշտների հետ այնպես սերտ կապի մեջ չի, ինչպես խմբավարական ամբիոնը: Եվրոպայի, Արևելքի, Ամերիկայի հայկական գաղութների երգչախմբերի ղեկավարներն այս ամբիոնի հետ սերտ կապի մեջ են: Սփյուռքահայ խմբավարներից շատերն իրենց կրթությունը ստացել են Երևանի կոնսերվատորիայում:  Այսօրվա ամբիոնում դասավանդում են անվանի երաժիշտներ Հովհաննես Չեքիջյանը, Դավիթ Ղազարյանը, Հովհաննես Միրզոյանը, Կարինե Առաքելյանը, Գեղունի Չթչյանը, Տիգրան Հեքեքյանը, Սոնա Հովհաննիսյանը և այլք։ Հայ սիմֆոնիկ դիրիժորների մի քանի սերունդ են դաստիարակել մեր կոնսերվատորիայի վաստակաշատ պրոֆեսորներ Արամ Քաթանյանը, Միքայել Մալունցյանը, Էմին Խաչատրյանը, Հակոբ Ոսկանյանը, Ռաֆայել Մանգասարյանը, Արամ Ղարաբեկյանը, Յուրի Դավթյանը և ուրիշներ։

Մեներգեցողությունը Երևանի երաժշտական ստուդիա-կոնսերվատորիայի ուսումնական գործընթացում տեղ գրաված առաջին դասընթացներից է: Մեներգեցողության բաժինը ղեկավարել են՝ Արուս Բաբալյանը /1921-1924/, Աստղիկ /Աստրա/ Աբրահամյանը /1925-1927/, Ելենա Կագարյանը /1927-1935/, Նադեժդա Կարդյանը /1935-1939/: 1939 թվականին մեներգեցողության դասարանների հիման վրա կազմավորվեց ամբիոնը: Ամբիոնի վարիչներն են եղել՝ Նադեժդա Կարդյանը /1939-1943; 1949-1953/, Հայկանուշ Դանիելյանը /1943-1949/, Թամար Շահնազարյանը /1953-1964; 1965-1970; 1973-1977/, Արմենուհի Քարամյանը /1964-1965/, Պավել Լիսիցյանը /1970-1973/, Տաթևիկ Սազանդարյանը /1977-1988/, Գոհար Գասպարյանը /1988-2007/, Սուսաննա Մարտիրոսյանը /2007-2018/, Գայանե Գեղամյանը /2018 մինչ օրս/: 1998 թվականին մեներգեցողության ամբիոնի դասախոսների մի մասը միավորվեցին մեներգեցողության նոր ամբիոնում /հետագայում՝ մեներգեցողության N 2 ամբիոն; ամբիոնի վարիչ՝ Սվետլանա Կոլոսարյան/: Մեներգեցողության ամբիոնները հիմնարար դերակատարում են ունեցել Հայաստանում համաշխարհային երգչական մշակույթի ավանդույթների արմատավորման  և հանրապետության երաժշտական թատրոններին, ֆիլհարմոնիկ կազմակերպություններին և ուսումնական հաստատություներին վոկալիստների բարձրակարգ կադրերով ապահովելու գործում։

Ամբիոնը Հայաստանի մշակույթի առաջատար հաստատությունների հետ համատեղ հանդիսանում է մի շարք հանրապետական մրցույթների հիմնադիր-նախաձեռնողը.

-        Ալեքսանդր Սպենդիարովի անվ.

-        Ավետիք Իսահակյանի անվ.

-        Belcanto

-        Թամար Շահնազարյանի անվ.

-        Տաթևիկ Սազանդարյանի անվ.

-        Արշավիր Կարապետյանի անվ.

-        Զարա Դոլուխանովայի և Պավել Լիսիցյանի անվ. և այլ

Այդ մրցույթների հաղթողների և դափնեկիրների ծանրակշիռ մասը Երևանի կոնսերվատորիայի շրջանավարտները, ասպիրանտները և ուսանողներն են։

Ամբիոնի ուսանողների, ասպիրանտների և շրջանավարտների թվում կան համաշխարհային օպերային և համերգային բեմահարթակներում ճանաչման արժանացած, միջազգային մրցույթների դափնեկիրներ. Հասմիկ Հացագործյան, Ջուլիետ Գալստյան, Գայանե Գրիգորյան, Արաքս Դավթյան, Աննա Մաիլյան, Լուսինե Մարկոսյան, Սուսաննա Մարտիրոսյան, Անահիտ Մխիթարյան, Հասմիկ Պապյան, Քրիստինե Սահակյան, Վարդուհի Խաչատրյան, Էլլադա Չախոյան, Գեղամ Գրիգորյան, Սարգիս Գույումջյան, Արսեն Սողոմոնյան, Բարսեղ Թումանյան և ուրիշներ

Ամբիոնի դասախոսների մեծ մասը ակտիվ համերգային գործունեությամբ զբաղվող երգիչներ են, որոնք սերտորեն կապված են հանրապետության համերգային կյանքի հետ: Նրանցից շատերն արժանացել են բարձր պարգևների և կոչումների: Հազարավոր համերգներ և օպերային ներկայացումներ Հայաստանում և արտասահմանում, ձայնագրություններ Հեռուստառադիոյի ֆոնդերում և սկավառակների վրա, բազմաճյուղ միջազգային կապեր՝ այսպիսին է այդ ամբիոնների գործունեության ոլորտի ընդհանուր բնութագիրը:

Մեներգեցողության դասարանների պրոֆեսորների դասավանդման սկզբունքներն իրենց արտացոլումն են գտել մի շարք գիտական ուսումնասիրություններում, դասագրքերում և մեթոդական ձեռնարկներում: Ամբիոնում ներմուծվել է հայ վոկալ կատարողականության պատմության դասընթացը /դասընթացի հիմնադիր՝ Արաքսի Սարյան/։

Հայաստանում ինչպես նվագախմբային, երգչախմբային, այնպես էլ օպերային արվեստի հիմքը դրվել է կոնսերվատորիայում. 1928-ի մայիսի 18-ին առաջին անգամ օպերային տեսարանները ներկայացվում են բեմական հագուստով և գրիմով նվագախմբի ուղեկցությամբ: Օպերային դասարանի ռեժիսորն էր Արշակ Բուրջալյանը, ում անունով այսօր կոնսերվատորիայում գործում է թատերական խմբակ և ուսանողների ուժերով ներկայացված նախագծերը հանրապետական ու միջազգային բեմերում մրցանակների են արժանանում: 

Երևանի կոնսերվատորիայի օպերային պատրաստման ամբիոնը ձևավորվել է 1968 թվականին օպերային դասարանի հիմքի վրա, որը գործում էր 1926-1927 ուսումնական տարվանից մեներգեցողության բաժնի /ավելի ուշ՝ ամբիոնի/ շրջանակներում: Տարբեր տարիների ամբիոնը ղեկավարել են Վահագն Բագրատունին /1968-1970; 1987-1990/, Ռաֆայել Մանգասարյանը /1970-1987/, Տիգրան Լևոնյանը /1991-2004/, Հովհաննես Հովհաննիսյանը /2004 - 2018/, Կարեն Լավչյան /2018-ից մինչ օրս/: Օպերային պատրաստման ամբիոնի աշխատանքը տարվում է կոնսերվատորիայի մեներգեցողության ամբիոնների, օպերային ստուդիայի, Երևանի օպերային թատրոնի հետ սերտ կապված: Վոկալիստ-դասախոսների, դիրիժորների, ռեժիսորների, դաշնակահար-կոնցերտմայստերների համատեղ աշխատանքի արդյունքում ուսանողները տիրապետում են օպերային արվեստի առանձնահատկություններին: Ամբիոնի շրջանավարտները բարձրակարգ մասնագետներ են, որոնք հաջողությամբ հանդես են գալիս շատ երկրների օպերային բեմահարթակներում

Օպերային դասարանի, իսկ այնուհետև՝ օպերային պատրաստման ամբիոնի ձևավորման գործին ակտիվորեն աջակցել են ականավոր դիրիժորներ Սուրեն Չարեքյանը, Գևորգ Բուդաղյանը, Կոնստանտին Սարաջևը, Միքայել Մալունցյանը, Ռաֆայել Մանգասարյանը, Յուրի Դավթյանը, Արամ Քաթանյանը, ռեժիսորներ Արշակ Բուրջալյանը, Լևոն Քալանթարը, Արմեն Գուլակյանը, Դավիթ Պողոսյանը, Ռաֆայել Ջրբաշյանը, Վահագն Բագրատունին, Տիգրան Լևոնյանը, Արմեն Մելիքսեթյանը, Հովհաննես Հովհաննիսյանը և ուրիշներիր՝ Արաքսի Սարյան/:

Հայ ավանդական երաժշտության կատարողական արվեստի ամբիոնը (նախկին՝ Երևանի կոնսերվատորիայի ժողովրդական նվագարանների և հայ երգեցողության ամբիոնը) կազմավորվել է 1980 թվականին 1978 թվականից գործող ժողովրդական նվագարանների ամբիոնի հիմքի վրա: Ամբիոնը ղեկավարել են քանոնի կատարողական արվեստի հիմնադիր, ճանաչված կոմպոզիտոր Խաչատուր Ավետիսյանը, 1992-2018 թվականներին՝ Արզաս Ոսկանյանը: Ամբիոնի ստեղծման փաստն էլ ավելի որոշակի դարձրեց Երևանի կոնսերվատորիայի ազգային դիմագիծը, որպես հայկական երաժշտական բուհ: Ամբիոնը անվիճելի դեր է կատարել Երևանի կոնսերվատորիայում հայ ժողովրդական, մասնավորապես գործիքային երաժշտության, գուսանների, աշուղների և վիպասանների արվեստի, ինչպես նաև միջնադարյան մասնագիտացված երաժշտության և Արևելքի դասական մոնոդիկ երաժշտության  /մուղամաթի/ ավանդույթների ներմուծման և արմատավորման գործում: Ամբիոնում դասավանդելու հրավիրվեցին հայ ժողովրդական և ժողովրդապրոֆեսիոնալ երաժշտության կատարողներ, որոնք իրենց գործունեությամբ լայն ճանաչում ունեին Հայաստանում և նրա սահմաններից դուրս /հազարավոր համերգներ, ելույթներ ռադիոյով և հեռուստատեսությամբ, ձայնագրություններ, սկավառակների և խտասալիկների թողարկումներ/: Հովհաննես Բադալյանը, Վարդուհի Խաչատրյանը, Անժելա Աթաբեկյան, Մանվել Բեգլարյանը, Ծովակ Համբարձումյանը և այլք։ Իրենց ահռելի գործնական փորձը երիտասարդներին փոխանցելուն զուգահեռաբար ավագ սերնդի ներկայացուցիչները մշակում են դասավանդման մեթոդաբանական սկզբունքներ, ստեղծում դասագրքեր և ուսումնական ձեռնարկներ, հարստացնում են ուսումնական և համերգային երկացանկը հեղինակային ստեղծագործություններով, ինչպես նաև հայ և օատարազգի կոմպոզիտորների ստեղծագործությունների մշակումներով և փոխադրումներով։

Ամենաերիտասարդ ամբիոնը ստեղծվել է 1997 թվականին՝ ռեկտոր Արմեն Սմբատյանի նախաձեռնությամբ։ Նպատակը երաժշտարվեստի այս ժանրում պրոֆեսիոնալ կադրեր պատրաստելն է։ Շուրջ քսանհիգ տարի ուսանողները մասնագիտության ընտրության լրացուցիչ հնարավորություն ունեն։ Ամբիոնի հիմնադիր ղեկավարն էր Երվանդ Երզնկյանը, ով հրավիրեց ճանաչված ու վաստակաշատ երաժիշտներ Ռաիսա Մկրտչյանին, Մարտին Վարդազարյանին, Ակսել Բակունցին, Էմմա Պետրոսյանին, Արմեն Թութունջյանին և ուրիշներին։ Շատ կարճ ժամանակահատվածում ընդլայնվեց ամբիոնի դասախոսական կազմը, համալրվեց տաղանդավոր ուսանողներով, որոնց ակնհայտ ձեռքբերումները կոնսերվատորիական կրթության արդյունքն են։ 

20-րդ դարի հայ երաժշտության մեջ էստրադային և ջազային նվագախմբերի գործունեությամբ ձևավորված ավանդույթները /ղեկավարներ՝ Արտեմի Այվազյան, Կոնստանտին Օրբելյան և ուրիշներ/ նոր հետաքրքիր ուղղվածություն ձեռք բերեցին ամբիոնի ստեղծման շնորհիվ։ Ամբիոնի աշխատանքներն իրականացվում են հանրապետության էստրադային և ջազային կոլեկտիվների, առաջին հերթին Հայաստանի Հեռուստառադիոյի էստրադային-սիմֆոնիկ նվագախմբի /ղեկավար՝ Երվանդ Երզնկյան/ և Հայաստանի ջազ-նվագախմբի /ղեկավար՝ Արմեն Հյուսնունց, այսօր՝ Դավիթ Մելքոնյան/ հետ սերտ համագործակցությամբ։ Հանրապետության երաժշտական կյանքի ամենատարբեր ոլորտներում ամբիոնի դասախոսների և ուսանողների լայն պահանջարկը Երևանի կոնսերվատորիայի այս ամենաերիտասարդ ենթաբաժնի գործունեության բնորոշ հատկանիշն է: Ամբիոնի անդամները մասնակցում են ջազային փառատոներին /այդ թվում՝ միջազգային/, ներկայանում են մենահամարգներով, հանդես են գալիս տարբեր նախագծերում։ 

Հասարակագիտության, գեղագիտության և արվեստի պատմության դասընթացները Երևանի կոնսերվատորիայի ուսումնական գործընթացում ներմուծվել են հիմնադրման օրվանից /դասընթացների շարքը վարում էր Արշակ Ադամյանը/: Ավելի ուշ անվանացանկը զգալի ընդլայնվեց փիլիսոփայության, քաղտնտեսության և այլ դասընթացների շնորհիվ: 1940-ական թվականների երկրորդ կեսին հասարակական գիտությունների դասընթացները համակարգվեցին համապատասխան ամբիոնի շրջանակներում /ներկայումս՝ հումանիտար գիտությունների ամբիոն/: Ամբիոնը /տարբեր տարիներ/ ղեկավարել են. Իզաբելլա Թամրազովան, Հենրիկ Գրիգորյանը, Արամայիս Նիկոյանը: Ամբիոնում դասավանդվող հիմնական դասընթացներն են. քրիստոնեական բարոյագիտության հիմունքներ, մշակութաբանության հիմունքներ, փիլիսոփայություն, գեղագիտություն, կերպարվեստի պատմություն, երաժշտական, մենեջմենթի հիմունքներ, ինֆորմատիկայի հիմունքներ, հայ ժողովրդի պատմություն և այլն։ 1973 թվականին լեզուների դասընթացները միավորվեցին որպես առանձին ընթացաշար /ղեկավար՝ Նինա Պողոսյան/, իսկ 1976 թվականին կազմավորվեց լեզուների ամբիոնը /տարբեր տարիների ղեկավարել են Նինա Պողոսյանը, Նեկտարինե Արամյանը և Վաղարշակ Գյուլբուդաղյանը/: Անհատական մոտեցումը հնարավոր է դարձնում ուսումնասիրվող լեզուն  կապել յուրաքանչյուր ուսանողի երաժշտական գլխավոր մասնագիտացման հետ: Ամբիոնի դասախոսները մշտապես աջակցում են կոնսերատորիայի անձնակազմին արտասահմանցի ուսանողների հետ շփման հարցերում: Ամբիոնում իրականացվում են հետևյալ լեզուների դասընթացները՝ հայերեն, ռուսերեն, գերմաներեն, անգլերեն, ֆրանսերեն, իտալերեն։